Ish presidentja e Kosovës Vjosa Osmani po shfaqet sërish në qendër të zhvillimeve politike në Kosovë, teksa vendi hyn në një fazë të re rikonfigurimi institucional dhe partiak, në prag të zgjedhjeve të përgjithshme dhe pas përfundimit të mandatit të saj presidencial. Lëvizjet e fundit politike dhe intensifikimi i kontakteve me LDK-në kanë rikthyer fokusin mbi rolin e saj të ardhshëm në skenën politike.

Ky pozicionim i ri potencial shihet si një përpjekje për të kapitalizuar profilin e saj institucional dhe mbështetjen ndërkombëtare. Në të njëjtën kohë, zhvillimet aktuale sinjalizojnë një riformatim të skenës politike.

Rrugëtimi nga LDK te Vetëvendosje

Osmani e nisi karrierën politike në LDK, ku u shndërrua në një nga figurat më të votuara dhe reformiste të partisë. Megjithatë, përplasjet me udhëheqjen e atëhershme, të drejtuar nga Isa Mustafa, çuan në një ndarje graduale gjatë vitit 2020.

Ajo kundërshtoi vendimet e LDK-së për koalicione qeverisëse dhe më pas u përjashtua nga strukturat drejtuese. Në prag të zgjedhjeve të vitit 2021, Osmani u rreshtua me Vetëvendosjen dhe Albin Kurtin, duke kandiduar në listën e tyre dhe duke siguruar një nga rezultatet më të forta elektorale në vend.

Në prill 2021, Osmani u zgjodh presidente me mbështetjen e shumicës parlamentare të udhëhequr nga Vetëvendosje. LDK nuk e mbështeti zyrtarisht kandidaturën e saj, megjithatë mori pjesë në proces për të mundësuar kuorumin dhe zgjedhjen e saj. Zgjedhja e saj shënoi një shkëputje të qartë politike nga LDK dhe një afrim të fortë me qeverinë e drejtuar nga Kurti, edhe pse në kuadër institucional rolet e tyre mbetën të ndara.

Marrëdhënia me Kurtin

Përplasjet mes Vjosa Osmani dhe Albin Kurti kanë qenë të dukshme në disa momente, por ndarja përfundimtare politike u bë në seancën e fundit të Kuvendit, në kuadër të afateve kushtetuese për zgjedhjen e presidentit. Kurti refuzoi të mbështesë një mandat të dytë për Osmanin, edhe pse LDK kishte gatishmërinë njëjtë sikurse herën e parë për të siguruar votat e nevojshme, me synim shmangien e një krize institucionale dhe të zgjedhjeve të parakohshme.

Vjosa Osmani perceptohet si më e harmonizuar me qëndrimet dhe mesazhet e partnerëve perëndimorë, veçanërisht të Bashkimit Evropian dhe Shteteve të Bashkuara të Amerikës, duke reflektuar një qasje më diplomatike dhe koordinuese në politikën e jashtme, si dhe një afërsi të theksuar me administratën amerikane. Kjo është reflektuar edhe në gjeste simbolike në raport me liderë amerikanë, përfshirë një moment të komentuar publikisht me Donald Trump. Në anën tjetër, Albin Kurti shpesh ndjek një linjë të theksuar sovraniste.

Përafrimi me LDK dhe impakti elektoral

Kryetari i Lidhjes Demokratike të Kosovës, Lumir Abdixhiku, ka dhënë sinjalet të forta përafrimi me Osmanin. Ai e ka përmendur Osmanin si opsionin e preferuar për presidente, duke deklarur edhe se “do të vijmë shumë shpejt me lajme të mira… pjesë e rikthimit të madh të LDK-së”, një mesazh që sugjeron se LDK e konsideron Osmanin një aset të rëndësishëm elektoral dhe politik, ndërsa rikthimi i saj shihet si pjesë e një strategjie më të gjerë për ripozicionimin dhe forcimin e partisë.

Në këtë kuadër, pritshmëritë brenda LDK-së janë që angazhimi i Osmanit të shoqërohet edhe me rikthimin e një pjese të konsiderueshme të elektoratit që ajo kishte tërhequr me vete gjatë kalimit te Vetëvendosje. Një elektorat që, sipas vlerësimeve, përfaqëson gati gjysmën e mbështetjes tradicionale të LDK-së në atë kohë.

Ajo pritet të jetë bartëse e listës së LDK-së në një koalicion të ri politik, i cili mund të zyrtarizohet këtyre ditëtve. Këto zhvillime sugjerojnë një rikonfigurim të skenës politike, ku roli i saj shihet si kyç për përfaqësimin elektoral dhe përpjekjet e LDK-së për rikthim të fuqishëm në arenën politike.

Is Osmani the “Queen” who will decide the election outcome?

Share on:

Sign up for our newsletter

More from