Courts

Këshilli Prokurorial i Kosovës (KPK) ka vendosur ta largojë Blerim Isufajn nga pozita e Kryeprokurorit të Prokurorisë Speciale të Republikës së Kosovës.
Vendimi u mor të premten, më 2 tetor, në një takim të jashtëzakonshëm të KPK-së, të udhëhequr nga kryesuesi Arian Gashi. Këshilli njoftoi se Isufaj do të vazhdojë të ushtrojë funksionin e prokurorit në Prokurorinë Speciale.
Pas largimit të tij nga pozita drejtuese, KPK-ja caktoi prokurorin Dren Paca ushtrues detyre të Kryeprokurorit, deri në plotësimin e pozitës sipas procedurave ligjore.
Sipas njoftimit të KPK-së, vendimi është marrë në mbështetje të Ligjit për Këshillin Prokurorial të Kosovës dhe bazohet në rrethana të konstatuara e të dokumentuara gjatë procedurës përkatëse. Këshilli përmendi si arsye keqmenaxhimin e Prokurorisë Speciale, jokompetencën në ushtrimin e detyrës, mospërmbushjen e përgjegjësive ligjore dhe mosarritjen e standardeve të kërkuara të performancës.
KPK-ja tha se menaxhimi i Prokurorisë Speciale, veçanërisht gjatë katër viteve të fundit, ka ndikuar në dobësimin e efikasitetit dhe rezultateve të institucionit. Sipas Këshillit, caktimi i ushtruesit të detyrës synon të sigurojë vazhdimësinë e punës dhe trajtimin e pandërprerë të rasteve penale.
KPK-ja bëri të ditur se do të përqendrohet në forcimin e kapaciteteve profesionale dhe menaxheriale të Prokurorisë Speciale, si dhe në përmirësimin e rezultateve në luftimin e krimit të organizuar dhe ndërkufitar përfshirë trafikimin e narkotikëve dhe qenieve njerëzore, kontrabandimin e migrantëve dhe pastrimin e parave.