Presidentja e Republikës së Kosovës, Vjosa Osmani-Sadriu, i ka dërguar një letër zyrtare kryesuesit të seancës konstituive të legjislaturës së nëntë të Kuvendit, z. Avni Dehari, ku e njofton për obligimin kushtetues që ka në funksionimin e institucioneve dhe kërkon mbajtjen urgjente të seancës konstituive brenda afatit prej 48 orësh.

Në këtë letër, Presidentja Osmani rikujton se bazuar në Kushtetutën e Republikës së Kosovës dhe në aktgjykimet e Gjykatës Kushtetuese, asnjë normë nuk mund të interpretohet në mënyrë që të bllokojë themelimin apo funksionimin efektiv të institucioneve. Ajo nënvizon se çdo person me autoritet publik, përfshirë edhe Kryesuesin e seancës, ka obligimin të veprojë në përputhje me frymën dhe dispozitat kushtetuese.

“Struktura e normave kushtetuese që ndërlidhen me themelimin e institucioneve shtetërore që burojnë nga vota e popullit, duhet të interpretohen në atë mënyrë që të jetësojnë dhe jo të bllokojnë themelimin dhe ushtrimin efektiv të funksioneve përkatëse,” citohet një pjesë e aktgjykimit të Gjykatës Kushtetuese që Presidentja e ka përfshirë në letrën e saj.

Presidentja gjithashtu kujton se, sipas rregullores së Kuvendit dhe vendimeve të mëparshme të Gjykatës Kushtetuese, nëse një seancë konstituive ndërpritet, ajo duhet të vazhdojë brenda afatit maksimal prej 48 orësh. Duke qenë se seanca e parë konstituive ka filluar më 8 prill 2025, ajo kërkon që vazhdimi i saj të bëhet menjëherë në përputhje me afatin kushtetues.

Në fund të letrës, Presidentja Osmani thekson gatishmërinë për të ftuar kryetarët e partive parlamentare në një takim konsultativ nëse një gjë e tillë konsiderohet e nevojshme për të diskutuar hapat e mëtejmë.

Letra vjen në një kohë të ndjeshme politike, kur zvarritja e themelimit të institucioneve të reja ka shkaktuar shqetësim publik dhe institucional. Me këtë kërkesë, Presidentja synon të sigurojë respektimin e normave kushtetuese dhe të garantojë funksionimin demokratik të shtetit.

Presidentja Letër për Kryesuesin e Seancës Konstituive: Kërkon Mbajtjen e Seancës Brenda 48 Orësh