Lajme Kombëtare
Shqipëria Po Zhvillon Sot Zgjedhjet: Për Herë të Parë Voton Edhe Diaspora
Shqipëria po zhvillon sot zgjedhjet e saj të përgjithshme parlamentare. Kryeministri Edi Rama, i cili është në kërkim të një mandati të katërt, përballet me rivalin e tij të përhershëm, Sali Berishën, 80-vjeçar dhe ish-kryeministër. Gara është zhvilluar në një ambient të polarizuar politikisht, të shoqëruar me retorikë të ashpër dhe angazhim intensiv për të tërhequr elektoratin.
Për herë të parë në historinë e vendit, shqiptarët që jetojnë jashtë vendit kanë të drejtë të votojnë përmes postës, çka i jep një dimension të ri zgjedhjeve të sivjetme. Më shumë se 3.7 milionë qytetarë janë të regjistruar për të votuar, për të zgjedhur mes mbi 2 mijë kandidatëve nga 53 parti politike dhe tre koalicione, në një nga garat më të gjera dhe të fragmentuara që ka parë ndonjëherë vendi.
Sondazhet e vendosin Partinë Socialiste si favorit, ndërkohë që Berisha ka rritur peshën e fushatës së tij duke angazhuar strategun amerikan Chris LaCivita, i njohur për drejtimin e fushatës së Donald Trump në vitin 2024. Votimi do të zgjasë deri në orën 19:00 të mbrëmjes së sotme, ndërsa rezultatet paraprake priten të shpallen ditën e hënë, më 12 maj.
Në përvjetorin e tij, nderohet një ndër mendjet më të ndritura të kombit
Në 26-vjetorin e vrasjes së Prof. Fehmi Aganit, Lidhja Demokratike e Kosovës ka përkujtuar figurën e tij madhore, duke e vlerësuar si një nga shtyllat kryesore të mendimit politik dhe rezistencës paqësore të popullit të Kosovës.
Kryetari i LDK-së, Lumir Abdixhiku, përmes një mesazhi përkujtimor, ka theksuar se vrasja e Prof. Aganit më 6 maj 1999 nga forcat serbe përbën një nga plagët më të rënda në historinë moderne të vendit, një atentat ndaj mendjes, urtësisë dhe idealit të Kosovës për liri dhe pavarësi.
“Prof. Fehmi Agani ishte një ndër figurat themelore të gjeneratës së artë të intelektualëve shqiptarë në fund të shekullit XX. Si pedagog i dalluar i Universitetit të Prishtinës, ai edukoi breza të tërë studentësh që më vonë u bënë prijës të lëvizjes për liri dhe pavarësi,” tha Abdixhiku.
Agani ishte ndër themeluesit e Lidhjes Demokratike të Kosovës dhe një bashkëpunëtor i ngushtë i presidentit historik Ibrahim Rugova. Ai mbajti edhe postin e nënkryetarit të LDK-së, duke luajtur rol kyç në hartimin e strategjisë paqësore të rezistencës kosovare gjatë viteve të 90-ta.
“Vrasja e tij ishte përpjekje për të goditur boshtin politik dhe intelektual të Kosovës. Sot, e kujtojmë me pietet figurën dhe veprën e tij, ndërsa trashëgimia që la pas mbetet udhërrëfyes në ndërtimin e një Kosove më të drejtë dhe më të denjë për sakrificat e bijve të saj më të mirë,” theksoi më tej Abdixhiku.
Prof. Fehmi Agani mbetet një nga figurat më të respektuara të historisë së re të Kosovës, i njohur për urtësinë, mendimin e thellë dhe përkushtimin ndaj çështjes kombëtare.
Gjykata cakton paraburgim për tre të dyshuar për krime në burgjet e Prishtinës dhe Lipjanit
Gjykata Themelore në Prishtinë – Departamenti Special, ka caktuar masën e paraburgimit prej një (1) muaji për tre të pandehur: B. T., M. I. dhe N. C., të cilët dyshohen për kryerjen e veprës penale “Krime lufte kundër popullatës civile”, gjatë luftës në Kosovë më 1998-1999.
Sipas njoftimit të gjykatës, kërkesa e Prokurorisë Speciale të Republikës së Kosovës është aprovuar pas seancës dëgjimore, ku gjyqtari i procedurës paraprake ka vlerësuar se ekzistojnë kushte ligjore për caktimin e masës së paraburgimit.
Dyshimet e bazuara të prokurorisë lidhen me trajtimin çnjerëzor të të burgosurve shqiptarë në Burgun e Prishtinës dhe paralelen në Lipjan gjatë periudhës së luftës. Të pandehurit B. T. dhe M. I., në cilësinë e zyrtarëve gardianë në këto institucione, akuzohen se në bashkëpunim me persona të tjerë, kanë kryer akte të torturës sistematike, duke përdorur mjete si shkopinj gome, shufra metalike, si dhe mjete të tjera dhune fizike.
Ndërkohë, e pandehura N. C., po ashtu në cilësinë e gardianes në paralelen e Lipjanit, dyshohet se ka ushtruar dhunë fizike dhe psikologjike ndaj të burgosurave shqiptare, gjithashtu në bashkëpunim me zyrtare të tjera të burgut.
Gjykata ka vlerësuar se ekziston rrezik real që, nëse të pandehurit lihen të lirë, ata mund të ndikojnë në dëshmitarët apo të dëmtojnë provat materiale, si dhe të arratisen për të shmangur ndjekjen penale. Po ashtu, pesha e rëndë e veprës penale ka bërë që masa e paraburgimit të konsiderohet e domosdoshme dhe se çdo masë tjetër do të ishte e pamjaftueshme për garantimin e zhvillimit të drejtë të procedurës gjyqësore.
Palët e pakënaqura nga vendimi kanë të drejtë ankese në Gjykatën e Apelit, përmes Gjykatës Themelore në Prishtinë.