Në shënimin e 36-vjetorit të themelimit të Lidhja Demokratike e Kosovës (LDK), kryetari i saj, Lumir Abdixhiku, mbajti një fjalim me tone historike dhe politike, duke e cilësuar LDK-në si “lëvizjen më të madhe kombëtare për liri, pavarësi dhe demokraci” dhe duke bërë thirrje për bashkim, rikthim të plotë euroatlantik dhe ndryshim në prag të zgjedhjeve parlamentare të vitit 2025.

Abdixhiku theksoi se 36 vitet e LDK-së përfaqësojnë “guxim, qëndrueshmëri dhe përkushtim të palëkundur” ndaj idealeve që kanë përcaktuar jo vetëm fatin e partisë, por edhe rrugëtimin shtetformues të Kosovës. Ai rikujtoi se LDK u themelua më 23 dhjetor 1989, në një periudhë represioni, si formacioni i parë politik me orientim të qartë pavarësist për Kosovën.

Në fjalimin e tij, Abdixhiku nderoi figurën e Presidentit historik Ibrahim Rugova, duke e cilësuar atë si atin themeltar të shtetit të Kosovës dhe udhëheqësin që artikuloi politikën e paqes, durimit dhe këmbënguljes për të drejtën e shqiptarëve të Kosovës.

Ai rikujtoi rolin kyç të LDK-së në organizimin e ngjarjeve historike si Deklarata e 2 Korrikut 1990, Kushtetuta e Kaçanikut dhe Referendumi i vitit 1991, si dhe ndërtimin e sistemeve paralele të arsimit, shëndetësisë dhe institucioneve shtetërore, që sipas tij ishin bazë e mbijetesës shoqërore dhe rezistencës kolektive.

“Rezistenca paqësore dhe ajo e armatosur, aleanca perëndimore dhe intervenimi i NATO-s, ishin procese të bartura nga vet Lidhja Demokratike e Kosovës,” u shpreh Abdixhiku.

Kryetari i LDK-së vlerësoi se partia udhëhoqi vendin edhe në dekadën e pasluftës, fillimisht në rindërtim dhe më pas në procesin e pavarësisë, i cili u kurorëzua më 17 shkurt 2008 me shpalljen e shtetit të Kosovës dhe njohjet ndërkombëtare.

Sipas tij, edhe dekada e tretë u shënua nga kontributi i LDK-së në forcimin e shtetësisë, integrimet ndërkombëtare dhe orientimin e pakthyeshëm drejt Bashkimit Evropian dhe NATO-s, duke e quajtur shtetndërtimin e Kosovës “me vulën e LDK-së”.

Në pjesën politike të fjalimit, Abdixhiku kritikoi ashpër atë që e quajti “populizëm qeverisës”, duke thënë se Kosova po udhëhiqet nga politika që kanë dëmtuar institucionet demokratike, kanë përçarë shoqërinë dhe kanë ftohur marrëdhëniet me aleatët perëndimorë.

“Republika jonë nuk po udhëhiqet nga besues që e duan të ardhmen, por nga ankues që na mbajnë në të shkuarën,” tha ai, duke bërë thirrje që Kosova të rikthehet në trajektoren e saj origjinale euroatlantike.

Duke iu referuar zgjedhjeve të ardhshme parlamentare, Abdixhiku theksoi se dekada e katërt e LDK-së do të jetë edhe dekadë e testit pro-perëndimor të Kosovës, e zhvillimit ekonomik, e anëtarësimit në NATO dhe e afrimit me BE-në.

Ai shtriu dorën e bashkimit ndaj të djathtës, rugovistëve dhe gjithë atyre që, sipas tij, besojnë në një Kosovë të barabartë me vendet evropiane, si dhe ndaj aleatëve ndërkombëtarë, duke premtuar rikthim të shpejtë nga izolimi.

“LDK nuk shtyhet nga etja për pushtet, por nga qëllimi i shtetit,” deklaroi Abdixhiku, duke e mbyllur fjalimin me bindjen se “ndryshimi po vjen” dhe me thirrjen që viti 2025 të jetë “vit i fitores historike, i rugovizmit dhe i qeverisë së ndryshimit”.

LDK shënon përvjetorin me thirrje për mobilizim politik