Google ka prezantuar një vizion të ri për të ardhmen e tregtisë digjitale, duke lançuar një sërë mjetesh të reja të bazuara në inteligjencë artificiale që synojnë ta shndërrojnë mënyrën se si konsumatorët blejnë dhe si shitësit shesin online. Iniciativa e re njihet si agentic commerce – një formë tregtie ku AI jo vetëm rekomandon produkte, por edhe vepron në mënyrë autonome për të përfunduar blerje në emër të përdoruesve.

Në qendër të këtij njoftimi qëndron Universal Commerce Protocol (UCP), një standard i hapur i krijuar për të lidhur platformat, shitësit, ofruesit e pagesave dhe agjentët e AI-së në një ekosistem të vetëm. Ky protokoll është zhvilluar në bashkëpunim me emra të mëdhenj të tregtisë elektronike si Shopify, Etsy, Wayfair, Target dhe Walmart.

Blerje të plota brenda Gemini

Falë UCP-së, agjentët e AI-së në Google Search (AI Mode) dhe në aplikacionin Gemini do të jenë në gjendje të menaxhojnë të gjithë procesin e blerjes nga kërkimi i produktit deri te pagesa pa pasur nevojë që përdoruesi të largohet nga platforma.

Për disa shitës të përzgjedhur në SHBA, Google ka nisur testimin e checkout-it direkt nga rezultatet e kërkimit, duke përdorur të dhënat e ruajtura në Google Wallet dhe PayPal. Shitësit mbeten gjithmonë pala përgjegjëse për transaksionin dhe kanë kontroll të plotë mbi integrimin.

Një tjetër risi është Business Agent, një agjent AI i markuar që lejon përdoruesit të komunikojnë drejtpërdrejt me kompanitë përmes Search. Ky funksion vepron si një konsulent virtual shitjeje, duke iu përgjigjur pyetjeve për produkte, disponueshmëri dhe opsione blerjeje. Marka si Lowe’s, Michael’s, Poshmark dhe Reebok pritet ta adoptojnë së shpejti këtë zgjidhje.

Google po prezanton gjithashtu atribute të reja në Merchant Center, të dizajnuara për t’i bërë produktet më të kuptueshme për sistemet e AI-së. Këto përfshijnë informacione shtesë si përgjigje ndaj pyetjeve të zakonshme, përputhshmëri me aksesorë apo përdorime specifike.

Në fushën e reklamimit, Google po teston Direct Offers, një format i ri që u mundëson shitësve të ofrojnë zbritje ose përfitime ekskluzive pikërisht në momentin kur përdoruesi është gati të blejë, brenda eksperiencave të drejtuara nga AI.

Me këtë nismë, Google synon të kalojë nga modeli tradicional i blerjes dhe klikimit drejt blerjeve sipas qëllimit, ku AI vepron si ndërmjetës aktiv mes konsumatorit dhe tregut. Sipas kompanisë, ky është një hap kyç drejt një tregtie më të shpejtë, më personale dhe më efikase.

Zhvillimet e fundit tregojnë se agentic commerce pritet të luajë një rol qendror në të ardhmen e tregtisë globale, duke ndryshuar rrënjësisht marrëdhënien mes teknologjisë, bizneseve dhe konsumatorëve.

AI hyn në checkout: Google ndryshon mënyrën e blerjes online