Lajme Sportive

Mbrëmje vendimtare për Kosovën, fitorja ndaj Islandës është objektivi kryesor

Kosova kërkon avancimin në Ligën B të Ligës së Kombeve pas një ecurie mbresëlënëse në Ligën C, ndërsa Islanda do të luftojë për të ruajtur statusin e saj në këtë kategori. Dueli i parë zhvillohet sonte në stadiumin “Fadil Vokrri” në Prishtinë me fillim nga ora 20:45, ndërsa ndeshja e kthimit do të luhet të dielën në Murcia të Spanjës. Ekipi është përqendruar në skemat taktike, si në aspektin sulmues ashtu edhe në atë mbrojtës, ndërsa atmosfera në skuadër është pozitive dhe optimiste. Futbollistët e Kosovës janë të motivuar për të shfrytëzuar avantazhin e fushës dhe për të arritur një rezultat të favorshëm para tifozërisë së zjarrtë vendase. Trajneri Franco Foda, ka theksuar rëndësinë e përqendrimit dhe disiplinës që nga minuta e parë. Ai vlerësoi Islandën si një kundërshtar të fortë me lojtarë cilësorë dhe eksperiencë në arenën ndërkombëtare, por theksoi se Kosova duhet të fokusohet te vetja. “Ne duhet të jemi të përgatitur dhe të vendosur për të bërë presion që nga sekonda e parë. E dimë që Islanda ka lojtarë me përvojë në klube të mëdha evropiane, por ne duhet të luajmë lojën tonë, të mbajmë intensitetin e duhur dhe të shfrytëzojmë çdo mundësi për të shënuar,” deklaroi Foda. Gjendja fizike e skuadrës është optimale, me kapitenin Amir Rrahmani dhe mesfushorin Valon Berisha të gatshëm për lojë, pasi kanë kryer stërvitjen e plotë me grupin. Milot Rashica shprehu besimin e tij në ekipin kombëtar dhe theksoi rëndësinë e mbështetjes nga tifozët. “Jemi në formë të mirë dhe kemi punuar fort për këtë ndeshje. Luajmë para publikut tonë dhe do të bëjmë gjithçka për ta shfrytëzuar këtë përparësi. Kualifikimi është një objektiv i madh për ne dhe do të luftojmë deri në fund për ta arritur,” u shpreh Rashica.