Lajme nga Politika
Votimi për formimin e Qeverisë së re përfundon pa shumicë
Mandatari për formimin e Qeverisë së Kosovës, Albin Kurti 3, nuk ka arritur të marrë votat e nevojshme për të krijuar kabinetin e ri qeveritar. Në seancën e sotme të Kuvendit të Kosovës, Kurti dhe kabineti që ai propozoi morën 56 vota për, 52 kundër dhe 4 abstenime, duke mbetur kështu nën pragun e kërkuar prej 61 votash për miratimin e Qeverisë.
Në mungesë të një qeverie të re, vendi mund të përballet me zgjedhje të parakohshme, nëse brenda afateve ligjore nuk arrihet ndonjë marrëveshje e re ndërmjet partive parlamentare.
Mbretëria e Bashkuar ka rikonfirmuar mbështetjen e saj për misionin paqeruajtës të udhëhequr nga NATO në Kosovë
Mbretëria e Bashkuar ka rikonfirmuar mbështetjen e saj për misionin paqeruajtës të udhëhequr nga NATO në Kosovë, duke zgjatur angazhimin e saj deri të paktën në dhjetor të vitit 2028.
Forcat e Armatosura Britanike do të vazhdojnë të mbajnë një forcë rezerve prej disa qindra trupash të gatshëm për t’u dislokuar në misionin KFOR me njoftim të shkurtër, duke forcuar rolin e gjatë të Britanisë në stabilizimin e rajonit të Ballkanit Perëndimor.
Britania ka kontribuar në KFOR që nga themelimi i këtij misioni në vitin 1999, pas ndërhyrjes së NATO-s që kishte për qëllim parandalimin e një katastrofe humanitare në Kosovë.
Sipas qeverisë britanike, kjo zgjatje është pjesë e strategjisë “NATO e para” të Mbretërisë së Bashkuar, të përcaktuar në Rishikimin Strategjik të Mbrojtjes, dhe synon gjithashtu të rrisë sigurinë në mbarë Ballkanin Perëndimor.
“Angazhimi i Mbretërisë së Bashkuar për paqe dhe siguri në Ballkanin Perëndimor është i palëkundur. Duke zgjatur mbështetjen tonë për Forcën e NATO-s në Kosovë, ne tregojmë rolin tonë si një aleat kryesor i NATO-s dhe qëndrojmë pranë vlerave tona të stabilitetit dhe demokracisë. Bashkëpunimi me partnerët tanë në Ballkanin Perëndimor është thelbësor, jo vetëm për stabilitetin rajonal, por edhe për sigurinë tonë kombëtare.” ka deklaruar kryeministri Keir Starmer:
Njoftimi përforcon gjithashtu bashkëpunimin e Mbretërisë së Bashkuar me vendet e Ballkanit Perëndimor, në kuadër të “Samitit të Liderëve të Ballkanit Perëndimor” që po mbahet në Londër, me synim forcimin e partneritetit në fushat e sigurisë dhe migracionit të parregullt.
Ministri i Mbrojtjes, Al Carns, ka shtuar poashtu se:
“Trupat tona kanë kryer qindra misione gjatë dekadave në mbështetje të KFOR-it, dhe ky zgjatim i angazhimit tonë do të ndihmojë në mbajtjen e Kosovës dhe Ballkanit Perëndimor më të sigurt. Paqeruajtja është një pjesë jetike e përkushtimit tonë për të mbajtur Britaninë e sigurt në shtëpi dhe të fortë jashtë saj, dhe dua të falënderoj qindra ushtarë britanikë që mbeten të gatshëm për të vepruar për sigurinë e Mbretërisë së Bashkuar dhe të Evropës.”
Në vitet e fundit, Britania ka mbështetur aftësitë e KFOR-it në Inteligjencë, Vëzhgim dhe Zbulim (ISR), për të siguruar që komandantët e misionit në Kosovë të kenë një pasqyrë të plotë të situatës në terren.Kontributi britanik në këtë mision financohet përmes Fondit të Sigurisë së Integruar, i cili përfshin disa departamente qeveritare dhe është në përputhje me prioritetet kombëtare të sigurisë.
Aktualisht, mbi 30 shtete kontribuojnë me trupa në KFOR – përfshirë Italinë, Turqinë, Poloninë, Shtetet e Bashkuara dhe Mbretërinë e Bashkuar – duke e bërë misionin një shtyllë kyçe të sigurisë në Kosovë dhe më gjerë në Ballkanin Perëndimor.
Kryetari i Prishtinës: “Mbrojtja e vlerave të UÇK-së është çështje kombëtare, përtej partive politike”
Kryetari i Prishtinës, Përparim Rama, ka deklaruar se mbrojtja e vlerave të Ushtrisë Çlirimtare të Kosovës (UÇK) nuk duhet të shihet si një çështje politike, por si një obligim kombëtar që i përket të gjithë qytetarëve të Kosovës.
Në një deklaratë publike, Rama theksoi se qysh në fillim të mandatit të tij, para katër vjetësh, Komuna e Prishtinës ka krijuar Sektorin për çështje të kategorive të dala nga lufta e UÇK-së, i cili udhëhiqet nga një ish-veteran dhe ka për mision përfaqësimin dhe mbrojtjen e të drejtave të veteranëve të luftës.
“Me i mbrojt vlerat e Ushtrisë Çlirimtare të Kosovës është çështje që na takon të gjithëve, përtej partive politike,” ka theksuar Rama.
“Në kuadër të kabinetit tim, krijuam një sektor të dedikuar që t’u shërbejë veteranëve të UÇK-së. Jemi e vetmja komunë në Kosovë që e kemi bërë këtë,” shtoi ai.
Rama theksoi se kjo nismë nuk është e lidhur me zhvillimet e fundit politike, por është një angazhim i vazhdueshëm dhe institucional për ruajtjen e trashëgimisë së luftës çlirimtare dhe për respektimin e kontributit të atyre që sakrifikuan për lirinë e vendit.
“Nuk është çështje e ditëve të fundit, nuk është çështje politike. Është çështje më e madhe, çështje kombëtare,” përfundoi Rama.
SHBA pezullon Dialogun Strategjik me Kosovën
Prishtinë 12 shtator 2025 — Shtetet e Bashkuara njoftuan të premten se kanë pezulluar për një kohë të pacaktuar Dialogun Strategjik me Kosovën, duke përmendur veprime të qeverisë që kanë rritur tensionet dhe kanë cenuar stabilitetin.
“Ne mbetemi të përkushtuar për të avancuar interesat e përbashkëta të Shteteve të Bashkuara dhe popullit të Kosovës. Marrëdhënia jonë me Kosovën bazohet në një qëllim të përbashkët: forcimin e paqes dhe stabilitetit si bazë për prosperitet ekonomik të ndërsjellë,” thuhet në deklaratë.
Dialogu Strategjik ishte konceptuar për të thelluar lidhjet ekonomike dhe diplomatike mes dy vendeve, duke ofruar një kornizë bashkëpunimi në fushën e qeverisjes, tregtisë dhe sigurisë. Pezullimi i tij për një kohë të pacaktuar përbën një pengesë në marrëdhëniet dypalëshe në një moment politik delikat për Kosovën.
Kuvendi i Kosovës zgjedh Dimal Bashën në krye
Pas një periudhe gjashtëmujore të paralizës institucionale, Kuvendi i Kosovës ka zgjedhur Dimal Bashën, deputet i Lëvizjes Vetëvendosje, si Kryetar të tij. Në votimin vendimtar, Basha mori 73 vota pro, 30 kundër dhe 3 abstenime.
Shumica e nevojshme për zgjedhjen e tij u arrit përmes votave të deputetëve të Vetëvendosjes, të një pjese të PDK-së, Aleancës dhe të komuniteteve joshumicë.
Më herët, Vetëvendosje kishte tentuar me disa kandidatura të tjera, përfshirë Albulena Haxhiun, Donika Gërvallën, Hekuran Muratin dhe Arbërie Nagavcin, por asnjëri prej tyre nuk kishte arritur të siguronte shumicën.
Me zgjedhjen e Bashës në tentativën e dytë, u zhbllokua procesi i konstituimit të Kuvendit, duke i dhënë fund krizës që kishte mbajtur peng institucionin më të lartë ligjvënës të vendit për gjashtë muaj.
Hajrulla Çeku zyrtarizohet kandidat i Vetëvendosjes për kryetar të Prishtinës
Lëvizja Vetëvendosje ka zyrtarizuar sot Hajrulla Çekun si kandidat për kryetar të Komunës së Prishtinës, pas vendimit të Këshillit të Qendrës së kësaj partie në kryeqytet.
“Është nder dhe përgjegjësi që e marr me gjithë përkushtimin tim,” deklaroi Çeku, pas zyrtarizimit të kandidaturës. Sipas tij, ky nuk është vetëm një hap formal, por një zotim i qartë për një drejtim të ri për kryeqytetin.
Ai theksoi se synon një Prishtinë që funksionon, që zhvillohet në mënyrë të qëndrueshme dhe se në fokus të fushatës së tij do të jetë qeverisja efikase, përfshirja qytetare dhe përmirësimi i shërbimeve publike.
PDK zyrtarizon 31 kandidatë për kryetarë komunash në zgjedhjet e 12 tetorit
Partia Demokratike e Kosovës (PDK) ka miratuar sot listën përfundimtare të kandidatëve për kryetarë të komunave, duke konfirmuar pjesëmarrjen në 36 komuna në zgjedhjet lokale të 12 tetorit. Vendimi është marrë gjatë mbledhjes së radhës të Kryesisë së PDK-së, në të cilën janë diskutuar zhvillimet politike në vend dhe përgatitjet për zgjedhjet lokale.
PDK ka shprehur shqetësimin e saj për situatën politike pas përfundimit të afatit 30-ditor të përcaktuar nga Gjykata Kushtetuese për konstituimin e Kuvendit të Kosovës. Partia vlerëson se vendi po përballet me një vakuum të rrezikshëm kushtetues dhe institucional, duke e lënë Kosovën të paqartë si në aspektin e brendshëm ashtu edhe në skenën ndërkombëtare. PDK njoftoi se do të presë aktgjykimin e Gjykatës Kushtetuese për kërkesën e dorëzuar nga deputetët e saj, me shpresën se do të qartësohet rruga drejt themelimit të institucioneve të reja dhe legjitime.
Duke hyrë në zgjedhjet lokale me një mobilizim të gjerë, PDK synon jo vetëm të ruajë komunat ku aktualisht qeveris, por edhe të fitojë drejtimin e komunave të tjera strategjike. Lista përfundimtare e 31 kandidatëve për kryetarë komunash është hartuar në përputhje me statutin dhe rregulloren e brendshme të partisë, ndërsa në disa degë është zhvilluar votim i fshehtë për përzgjedhjen e kandidatit.
Lista përfundimtare e kandidatëve të PDK-së për kryetarë komunash është si vijon:
- Prishtinë – Uran Ismaili
- Ferizaj – Agim Aliu
- Prizren – Shaqir Totaj
- Mitrovicë – Arian Tahiri
- Vushtrri – Ferit Idrizi
- Skenderaj – Sami Lushtaku
- Drenas – Petrit Hajdari
- Kaçanik – Sabedin Vishi
- Hani i Elezit – Mehmet Ballazhi
- Gjilan – Riad Rashiti
- Pejë – Arta Nallbani
- Gjakovë – Ervin Shabani
- Klinë – Sokol Bashota
- Lipjan – Shukri Buja
- Shtime – Përparim Ramusa
- Dragash – Shaban Shabani
- Malishevë – Gëzim Krasniqi
- Rahovec – Edon Cana
- Suharekë – Dardan Berisha
- Podujevë – Isak Shabani
- Fushë Kosovë – Rrahim Tërrnava
- Kamenicë – Jona Arifi
- Viti – Bekim Azizi
- Istog – Ali Nimanaj
- Deçan – Korab Mushkolaj
- Zubin Potok – Izmir Zeqiri
- Zveçan – Ilir Peci
- Mitrovicë e Veriut – Flutura Hamza
- Leposaviq – Shaqir Hetemi
- Shtërpcë – Garip Sahiti
- Novobërdë – Selatin Nuhiu
Dështon seanca e fundit e Kuvendit, ndërsa përfundon edhe afati kushtetues i caktuar nga Gjykata
Kuvendi i Kosovës nuk arrin te konstituohet as pas 54 seancave mbajtura. Lëvizja Vetëvendosje, e cila doli partia më e madhe në zgjedhjet e shkurtit, ka propozuar vazhdimisht Albulena Haxhiun për këtë post, duke këmbëngulur në zhvillimin e votimit përmes një procedure të fshehtë. Megjithatë, partitë opozitare kanë kundërshtuar si kandidaturën e Haxhiut, ashtu edhe metodën e votimit.
Kjo seancë shënoi gjithashtu përfundimin e afatit të përcaktuar nga Gjykata Kushtetuese, e cila kishte vendosur që në rast të moskonstituimit të Kuvendit deri më 26 korrik, të gjithë deputetët të pezullohen nga çdo veprimtari parlamentare në periudhën 27 korrik deri më 8 gusht. Ky vendim u mor me qëllim të mbrojtjes së rendit kushtetues dhe shmangies së një bllokade të zgjatur institucionale.
Pa një rrugë të qartë pritet të thirren zgjedhje të parakohshme, potencialisht pas zgjedhjeve lokale të planifikuara për 12 tetor 2025. Një zhvillim i tillë do të ndikonte edhe në procesin e zgjedhjes së Presidentit të ri të Kosovës, mandati i të cilit përfundon në fillim të vitit 2026.