Politikë

Prishtinë, 11 Mars 2025 – Sekretari i Përgjithshëm i NATO-s, së bashku me përfaqësuesit e Këshillit të Atlantikut të Veriut dhe partnerët operativë të KFOR-it, ka zhvilluar sot një vizitë zyrtare në Prishtinë. Ai u prit nga Presidentja e Kosovës, Vjosa Osmani, me të cilën diskutoi për situatën e sigurisë në Kosovë dhe rajon. Sekretari i Përgjithshëm theksoi se prania e tij dhe e përfaqësuesve të NATO-s në Kosovë është një dëshmi konkrete e angazhimit të Aleancës për stabilitetin e vendit dhe të rajonit. “NATO ka mbështetur paqen dhe sigurinë në Ballkanin Perëndimor për 30 vite dhe përkushtimi ynë mbetet i fortë edhe sot,” u shpreh ai. Ai vlerësoi rolin e KFOR-it si misioni më i madh dhe më i gjatë i NATO-s, i cili operon nën mandatin e Kombeve të Bashkuara. Gjatë fjalës së tij, ai lavdëroi punën e trupave të KFOR-it nën udhëheqjen e gjeneralit Enrico Barduani, duke thënë se ata vazhdojnë të punojnë me përkushtim për të siguruar një mjedis të sigurt për të gjitha komunitetet në Kosovë. Ai gjithashtu përmendi mbështetjen që NATO ofron për institucionet e sigurisë së Kosovës përmes Ekipit Këshillues dhe Lidhës, i cili ndihmon në ngritjen e kapaciteteve, edukimin dhe koordinimin e trajnimeve. Sekretari i Përgjithshëm theksoi se siguria në Ballkanin Perëndimor është e ndërlidhur me stabilitetin e gjithë rajonit euro-atlantik. Ai paralajmëroi se “dekada të paqes së fituar me vështirësi nuk duhet të rrezikohen”, duke shtuar se KFOR-i është plotësisht i gatshëm të përgjigjet ndaj çdo zhvillimi të sigurisë në Kosovë. Ai përsëriti rëndësinë e bashkëpunimit të ngushtë mes Prishtinës dhe KFOR-it, si pjesë e angazhimeve afatgjata të NATO-s për stabilitet në rajon. Në fjalën e tij, ai theksoi zgjidhjen e një paqe të qëndrueshme dhe se NATO mbështet fuqishëm dialogun mes Kosovës dhe Serbisë, të ndërmjetësuar nga Bashkimi Evropian. “Zgjidhja e vetme për çështjet e hapura dhe një të ardhme të sigurt është përmes dialogut, ku të drejtat e të gjitha komuniteteve respektohen dhe mbrohen”, tha ai. Në këtë kontekst, ai bëri thirrje që të dyja palët të tregojnë fleksibilitet dhe të ndërmarrin kompromiset e nevojshme për të avancuar në procesin e normalizimit. “E di që këto janë vendime të vështira, por duhet të fokusohemi në përfitimet afatgjata. Normalizimi sjell stabilitet më të madh, më shumë investime dhe siguri të qëndrueshme për të gjithë rajonin”, shtoi ai. Në përfundim të vizitës, Sekretari i Përgjithshëm i NATO-s falënderoi Presidenten Osmani për mikpritjen dhe diskutimet konstruktive, duke theksuar se NATO do të vazhdojë të luajë një rol kyç në mbështetjen e sigurisë dhe stabilitetit në Kosovë dhe Ballkanin Perëndimor.

Në një konferencë për media pas mbledhjes së Kryesisë së LDK-së, kryetari i saj, Lumir Abdixhiku, ritheksoi qëndrimin e partisë lidhur me pjesëmarrjen në qeverisje. “Qëndrimi ynë elektoral dhe paraelektoral ka qenë se LDK-ja nuk do të jetë pjesë e asnjë qeverie pa pozitën e kryeministrit. Ky vazhdon të jetë qëndrimi ynë tani,” theksoi Abdixhiku. Ai gjithashtu nënvizoi se LDK-ja nuk është e interesuar për krijimin e një qeverie afatshkurtër dhe se stabiliteti politik është një kusht thelbësor për të garantuar qeverisje të qëndrueshme. “Po ashtu kemi thënë se LDK nuk synon dhe nuk do të punojë për një qeveri afatshkurtër. Pa zgjidhjen e çështjes bazike të Presidentit, që përcakton zgjedhjet e ardhshme nacionale të Kosovës, LDK nuk beson se do të ketë stabilitet qeveritar Po ashtu kemi thënë se LëDëKëja nuk synon dhe nuk do të punojë për një qeveri afatshkurtër. Pa zgjidhjen e çështjes bazike të Presidentit, që përcakton zgjedhjet e ardhshme nacionale të Kosovës, LDK-ja nuk beson se do të ketë stabilitet qeveritar dhe për qeveri afatshkurtra nuk është e interesuar fare” deklaroi Abdixhiku. Ky qëndrim i LDK-së vjen në një kohë kur diskursi politik në Kosovë është i fokusuar te tek mundësia e krijimit të koalicioneve qeveritare.

Presidenti francez Emmanuel Macron ka sugjeruar hapjen e diskutimeve strategjike mbi mundësinë e zgjerimit të mbrojtjes bërthamore franceze për aleatët evropianë. Në një fjalim televiziv të mërkurën, ai theksoi se kapacitetet bërthamore të Francës mbeten sovrane, por është i gatshëm të diskutojë mbi rolin e tyre në garantimin e sigurisë evropiane. Kjo iniciativë vjen mes shqetësimeve për angazhimin e Shteteve të Bashkuara ndaj mbrojtjes së Evropës. Kancelari i ardhshëm gjerman, Friedrich Merz, ka paralajmëruar se NATO mund të pësojë ndryshime deri në qershor dhe ka kërkuar një rishikim më të thellë të mbrojtjes bërthamore franceze dhe britanike si alternativa të mundshme. Si e vetmja fuqi bërthamore e Bashkimit Evropian, Franca disponon rreth 290 koka bërthamore. Macron ka nënvizuar se vendimi për përdorimin e tyre do të mbetet ekskluzivisht në dorën e presidentit francez, duke riafirmuar autonominë strategjike të vendit. Propozimi ka ngjallur reagime të ndryshme. Polonia dhe vendet baltike e kanë mirëpritur këtë ide, duke e parë si një hap të rëndësishëm për forcimin e mbrojtjes evropiane. Ndërkohë, Rusia e ka dënuar këtë nismë, duke e quajtur një veprim tepër konfrontues.

Gjatë një forumi të zyrtarëve qeveritarë në Kiev, që shënoi trevjetorin e pushtimit të plotë të Ukrainës nga Rusia, Zelenskyy theksoi se do të pranonte të largohej nga posti i tij nëse kjo do të ndihmonte vendin e tij të arrinte një marrëveshje të qëndrueshme paqeje. “Nëse për të arritur paqen është e nevojshme që unë të heq dorë nga posti im, jam i gatshëm,” deklaroi ai. Duke iu përgjigjur një pyetjeje të një gazetari nëse do ta shkëmbente presidencën për paqe, Zelenskyy u shpreh qartë: “Mund ta shkëmbej për NATO-n.” Deklarata e tij vjen në një kohë kur Ukraina vazhdon të përballet me agresionin rus dhe kërkon garanci të forta sigurie nga Perëndimi. Deklarata vjen në një kohë kur në Riad kanë nisur diskutime në nivel të lartë midis zyrtarëve amerikanë dhe rusë, me synimin për të krijuar një kornizë bashkëpunimi që do të ndihmojë në përfundimin e luftës dhe normalizimin e marrëdhënieve.

Departamenti i Shtetit i Shteteve të Bashkuara ka hequr një deklaratë nga faqja e tij zyrtare, e cila më parë theksonte se Uashingtoni nuk e mbështet pavarësinë e Tajvanit. Ky ndryshim ka shkaktuar zemërim në Pekin, me Ministrinë e Jashtme kineze që e ka cilësuar këtë veprim si një “sinjal të gabuar” për forcat separatiste tajvaneze dhe ka kërkuar nga SHBA që ta “korrigjojë gabimin e saj”. Më herët, në faqen informuese mbi marrëdhëniet SHBA-Tajvan, ishte përfshirë qartë fraza: “Ne nuk e mbështesim pavarësinë e Tajvanit”, por kjo fjali u hoq javën e kaluar si pjesë e një përditësimi të cilësuar si “rutine” nga Departamenti i Shtetit. Kina e konsideron Tajvanin një provincë separatiste që në një të ardhme do të ribashkohet me territorin e saj, duke mos përjashtuar as përdorimin e forcës për ta arritur këtë qëllim. Tajvani funksionon si një shtet de facto me qeveri të zgjedhur, ushtri, ekonomi të fortë dhe politikë të jashtme të pavarur, por nuk është anëtar i OKB-së për shkak të kundërshtimit të Kinës. Vetëm një numër i vogël shtetesh e njohin zyrtarisht Tajvanin si shtet sovran, por shumë vende, përfshirë SHBA-në, mbajnë marrëdhënie joformale dhe e mbështesin në fusha të ndryshme.

Presidentja e Komisionit Evropian, Ursula von der Leyen, mbajti një fjalim të fuqishëm në Konferencën e Sigurisë në Mynih (MSC), duke theksuar nevojën që Evropa të mos mbetet vetëm një vëzhguese e ndryshimeve gjeopolitike, por të marrë një rol aktiv në formësimin e tyre. “Detyra jonë këtu në MunSecConf nuk është vetëm të përshkruajmë këtë peizazh të ri gjeopolitik, por ta formësojmë atë,” deklaroi ajo. “Dhe ta formësojmë në një mënyrë që siguron që vlerat tona evropiane të mbeten dhe interesat tona të mbrohen.”

Lidhja Demokratike e Kosovës (LDK) ka shënuar një rritje të ndjeshme në zgjedhjet e fundit, e qe pritet të arritjë rreth 180 mijë vota dhe një përqindje prej 20%, nga vetëm 12% që kishte më parë. Kryetari i partisë, Lumir Abdixhiku, e cilësoi këtë një rikthim në bazën e LDK-së dhe një sukses të rëndësishëm pas rënies historike. Ai theksoi se, megjithëse partia nuk e ka fituar garën, kjo rritje është një arritje domethënëse dhe dëshmi e mbështetjes së qytetarëve për platformën dhe vizionin e saj. Në reagimin e tij, Abdixhiku kritikoi procesin e numërimit të votave, duke e quajtur të papranueshme vonesën e Komisionit Qendror të Zgjedhjeve (KQZ) për një detyrë që, sipas tij, është bazike dhe për të cilën kishte katër vjet kohë për t’u përgatitur. Ai theksoi nevojën për të rifilluar përdorimin e metodave klasike të numërimit, duke shprehur shqetësimin për menaxhimin e procesit zgjedhor. Sipas tij, përtej sfidave teknike, rezultati i zgjedhjeve reflekton vullnetin e qytetarëve, të cilin ai dhe LDK-ja e respektojnë plotësisht. Duke folur për të ardhmen, Abdixhiku tha se LDK do të vazhdojë të mbajë premtimet e saj dhe të ruajë një standard të lartë të politikës, duke mos e parë pushtetin si qëllim në vetvete. Ai bëri thirrje për unitet brenda partisë dhe durim deri në përfundimin e numërimit, duke shprehur bindjen se “dritë do të ketë sërish.”

Lidhja Demokratike e Kosovës (LDK) ka përmbyllur tubimin përmbyllës të fushatës zgjedhore në Prishtinë, duke shënuar një moment kyç në rrugëtimin e saj politik drejt zgjedhjeve. Tubimi u karakterizua nga një pjesëmarrje e madhe e simpatizantëve dhe anëtarëve të partisë, të cilët shprehën mbështetjen e tyre për vizionin e LDK-së për të ardhmen e Kosovës. Në fjalën e tij para mbështetësve, kryetari i LDK-së Lumir Abdixhiku theksoi ndjenjën e unitetit dhe përkushtimin ndaj vlerave demokratike, duke falënderuar të gjithë ata që e kishin mbështetur gjatë fushatës. Në fund të fjalimit, ai bëri thirrje për një përpjekje të pandalshme për të mbrojtur dhe për të ndërtuar një Kosovë më të mirë, duke theksuar se Republika e Kosovës nuk është e ndarë në parti apo interesa të ngushta, por përfaqëson një ëndërr dhe një mision të përbashkët për të gjithë qytetarët. “Ka një Kosovë dhe një Kosovë të vetme. Ka një ëndërr dhe një ëndërr të vetme. Ka një mision dhe një mision të vetëm. Republika jonë është vet ëndrra jonë! Ndryshimi sot, është misioni jonë!” Tubimi i LDK-së në Prishtinë shënoi kulmin e një fushate të gjatë dhe dinamike, me pritshmëri të larta për rezultatin e zgjedhjeve të ardhshme.