Politikë

Pas një periudhe gjashtëmujore të paralizës institucionale, Kuvendi i Kosovës ka zgjedhur Dimal Bashën, deputet i Lëvizjes Vetëvendosje, si Kryetar të tij. Në votimin vendimtar, Basha mori 73 vota pro, 30 kundër dhe 3 abstenime.
Shumica e nevojshme për zgjedhjen e tij u arrit përmes votave të deputetëve të Vetëvendosjes, të një pjese të PDK-së, Aleancës dhe të komuniteteve joshumicë.
Më herët, Vetëvendosje kishte tentuar me disa kandidatura të tjera, përfshirë Albulena Haxhiun, Donika Gërvallën, Hekuran Muratin dhe Arbërie Nagavcin, por asnjëri prej tyre nuk kishte arritur të siguronte shumicën.
Me zgjedhjen e Bashës në tentativën e dytë, u zhbllokua procesi i konstituimit të Kuvendit, duke i dhënë fund krizës që kishte mbajtur peng institucionin më të lartë ligjvënës të vendit për gjashtë muaj.

Lëvizja Vetëvendosje ka zyrtarizuar sot Hajrulla Çekun si kandidat për kryetar të Komunës së Prishtinës, pas vendimit të Këshillit të Qendrës së kësaj partie në kryeqytet.
“Është nder dhe përgjegjësi që e marr me gjithë përkushtimin tim,” deklaroi Çeku, pas zyrtarizimit të kandidaturës. Sipas tij, ky nuk është vetëm një hap formal, por një zotim i qartë për një drejtim të ri për kryeqytetin.
Ai theksoi se synon një Prishtinë që funksionon, që zhvillohet në mënyrë të qëndrueshme dhe se në fokus të fushatës së tij do të jetë qeverisja efikase, përfshirja qytetare dhe përmirësimi i shërbimeve publike.

Partia Demokratike e Kosovës (PDK) ka miratuar sot listën përfundimtare të kandidatëve për kryetarë të komunave, duke konfirmuar pjesëmarrjen në 36 komuna në zgjedhjet lokale të 12 tetorit. Vendimi është marrë gjatë mbledhjes së radhës të Kryesisë së PDK-së, në të cilën janë diskutuar zhvillimet politike në vend dhe përgatitjet për zgjedhjet lokale.
PDK ka shprehur shqetësimin e saj për situatën politike pas përfundimit të afatit 30-ditor të përcaktuar nga Gjykata Kushtetuese për konstituimin e Kuvendit të Kosovës. Partia vlerëson se vendi po përballet me një vakuum të rrezikshëm kushtetues dhe institucional, duke e lënë Kosovën të paqartë si në aspektin e brendshëm ashtu edhe në skenën ndërkombëtare. PDK njoftoi se do të presë aktgjykimin e Gjykatës Kushtetuese për kërkesën e dorëzuar nga deputetët e saj, me shpresën se do të qartësohet rruga drejt themelimit të institucioneve të reja dhe legjitime.
Duke hyrë në zgjedhjet lokale me një mobilizim të gjerë, PDK synon jo vetëm të ruajë komunat ku aktualisht qeveris, por edhe të fitojë drejtimin e komunave të tjera strategjike. Lista përfundimtare e 31 kandidatëve për kryetarë komunash është hartuar në përputhje me statutin dhe rregulloren e brendshme të partisë, ndërsa në disa degë është zhvilluar votim i fshehtë për përzgjedhjen e kandidatit.
Lista përfundimtare e kandidatëve të PDK-së për kryetarë komunash është si vijon:

1. Prishtinë – Uran Ismaili
2. Ferizaj – Agim Aliu
3. Prizren – Shaqir Totaj
4. Mitrovicë – Arian Tahiri
5. Vushtrri – Ferit Idrizi
6. Skenderaj – Sami Lushtaku
7. Drenas – Petrit Hajdari
8. Kaçanik – Sabedin Vishi
9. Hani i Elezit – Mehmet Ballazhi
10. Gjilan – Riad Rashiti
11. Pejë – Arta Nallbani
12. Gjakovë – Ervin Shabani
13. Klinë – Sokol Bashota
14. Lipjan – Shukri Buja
15. Shtime – Përparim Ramusa
16. Dragash – Shaban Shabani
17. Malishevë – Gëzim Krasniqi
18. Rahovec – Edon Cana
19. Suharekë – Dardan Berisha
20. Podujevë – Isak Shabani
21. Fushë Kosovë – Rrahim Tërrnava
22. Kamenicë – Jona Arifi
23. Viti – Bekim Azizi
24. Istog – Ali Nimanaj
25. Deçan – Korab Mushkolaj
26. Zubin Potok – Izmir Zeqiri
27. Zveçan – Ilir Peci
28. Mitrovicë e Veriut – Flutura Hamza
29. Leposaviq – Shaqir Hetemi
30. Shtërpcë – Garip Sahiti
31. Novobërdë – Selatin Nuhiu

Kuvendi i Kosovës nuk arrin te konstituohet as pas 54 seancave mbajtura. Lëvizja Vetëvendosje, e cila doli partia më e madhe në zgjedhjet e shkurtit, ka propozuar vazhdimisht Albulena Haxhiun për këtë post, duke këmbëngulur në zhvillimin e votimit përmes një procedure të fshehtë. Megjithatë, partitë opozitare kanë kundërshtuar si kandidaturën e Haxhiut, ashtu edhe metodën e votimit.
Kjo seancë shënoi gjithashtu përfundimin e afatit të përcaktuar nga Gjykata Kushtetuese, e cila kishte vendosur që në rast të moskonstituimit të Kuvendit deri më 26 korrik, të gjithë deputetët të pezullohen nga çdo veprimtari parlamentare në periudhën 27 korrik deri më 8 gusht. Ky vendim u mor me qëllim të mbrojtjes së rendit kushtetues dhe shmangies së një bllokade të zgjatur institucionale.
Pa një rrugë të qartë pritet të thirren zgjedhje të parakohshme, potencialisht pas zgjedhjeve lokale të planifikuara për 12 tetor 2025. Një zhvillim i tillë do të ndikonte edhe në procesin e zgjedhjes së Presidentit të ri të Kosovës, mandati i të cilit përfundon në fillim të vitit 2026.

Kuvendi i Kosovës mbetet i zhytur në një bllokadë institucionale të paprecedentë, katër muaj pas zgjedhjeve të përgjithshme të mbajtura në shkurt të vitit 2025. Pavarësisht 46 përpjekjeve, Kuvendi ende nuk ka arritur të konstituohet. Lëvizja Vetëvendosje, e cila doli partia më e madhe në zgjedhjet e shkurtit, ka propozuar vazhdimisht Albulena Haxhiun për këtë post, duke këmbëngulur në zhvillimin e votimit përmes një procedure të fshehtë. Megjithatë, një front i bashkuar i partive opozitare ka kundërshtuar si kandidaturën e Haxhiut, ashtu edhe metodën e votimit të fshehtë, duke ngritur shqetësime për përputhshmërinë kushtetuese të kësaj praktike. 
Gjykata Kushtetuese ka ndërhyrë, duke vendosur një afat për konstituimin e Kuvendit deri më 26 korrik, por pa specifikuar pasojat në rast të mosrespektimit të këtij afati. Më shqetësuese është se vendi rrezikon të humbasë mbështetje të rëndësishme financiare nga Bashkimi Evropian për shkak të mungesës së një Kuvendi të konstituuar që të ratifikojë marrëveshjet përkatëse. Ndërkohë, qeveria në detyrë vazhdon të funksionojë me mandat teknik dhe pa mbikëqyrjen e Kuvendit.
Pa një rrugë të qartë drejt konsensusit, analistët politikë besojnë se zgjedhjet e reja parlamentare po bëhen gjithnjë e më të pashmangshme. Nëse ngërçi vazhdon përtej fundit të korrikut, pritet të thirren zgjedhje të parakohshme, potencialisht pas zgjedhjeve lokale të planifikuara për 12 tetor 2025. Një zhvillim i tillë do të ndikonte edhe në procesin e zgjedhjes së Presidentit të ri të Kosovës, mandati i të cilit përfundon në fillim të vitit 2026. Partnerët ndërkombëtarë, kanë shprehur vazhdimisht shqetësimin e tyre të thellë për ngërçin e zgjatur institucional.

Kryetari i Lidhjes Demokratike të Kosovës, Lumir Abdixhiku, në një konferencë për media pas mbledhjes së Kryesisë së LDK-së, ka njoftuar se partia ka votuar dhe zyrtarizuar me unanimitet ekipin e saj për zgjedhjet lokale që do të mbahen më 12 tetor 2025.
“Pas një procesi të brendshëm konsultativ, të ndërtuar mbi besim dhe unitet, LDK vjen para qytetarëve me më të mirët që ka. Ky ekip përfaqëson dijen, vizionin dhe përkushtimin tonë për zhvillimin e komunave të vendit,” deklaroi Abdixhiku.
Ai theksoi se pjesë e ekipit janë figura të dëshmuara që kanë rikthyer besimin në qeverisje dhe kanë sjellë projekte konkrete zhvillimi në komunat e tyre, si dhe energji të reja që sjellin pasionin e ndryshimit dhe gatishmërinë për të marrë përgjegjësi.
Ekipi i LDK-së për zgjedhjet lokale përfshin këta kandidatë për kryetarë komunash:

• Përparim Rama – Prishtinë
• Imri Ahmeti – Lipjan
• Xhafer Gashi – Obiliq
• Besnik Osmani – Fushë Kosovë
• Ekrem Hyseni – Podujevë
• Gazmend Heta – Drenas
• Xhafer Tahiri – Vushtrri
• Gëzim Plakolli – Mitrovicë
• Gazmend Muhaxheri – Pejë
• Ilir Ferati – Istog
• Bexhet Xheladini – Dragash
• Driton Selmanaj – Prizren
• Ardian Shala – Suharekë
• Visar Azemi – Ferizaj
• Kastriot Shabani – Shtime
• Valmir Ahmeti – Shtërpcë
• Sokol Haliti – Viti
• Arbër Ismajli – Gjilan
• Bajrush Ymeri – Novobërdë
• Ruzhdi Shehu – Junik
• Shefqet Shehu – Gjakovë
• Jeton Mushkolaj – Deçan
• Burim Krasniqi – Rahovec

Abdixhiku bëri të ditur se në ditët në vijim do të prezantohen edhe kandidatët për Malishevë, Klinë, Kamenicë dhe Kaçanik, si dhe do të finalizohet lista e mbi 994 këshilltarëve lokal me të cilët LDK do të garojë në të gjitha komunat.
“Me këtë ekip dhe me përkrahjen e qytetarëve tanë, LDK është gati. Të rikthejmë përgjegjësinë, të rikthejmë shpresën. Le të fitojmë!”, përfundoi Abdixhiku deklaratën e tij.
Zgjedhjet lokale të 12 tetorit shihen si një test i rëndësishëm për të gjitha partitë, ndërsa LDK synon të rikthejë komunat kyçe dhe të rrisë fuqinë e saj në nivel lokal, duke premtuar transparencë dhe zhvillim për qytetarët.

Prishtinë, 9 qershor 2025 – Në prag të mbledhjes së 29-të të Kuvendit, kryetari i Lidhjes Demokratike të Kosovës ka përsëritur thirrjen e tij për krijimin e një Qeverie të Unitetit, duke theksuar se kriza politike që po zgjat prej më shumë se tre muajsh duhet të trajtohet si mundësi për bashkëpunim dhe përgjegjësi kolektive.
“Mes betejave partiake që s’përputhen askund, një e vërtetë na bërtet qartë: askush, pas tre muajsh, nuk ka një shumicë,” tha ai. “Prandaj edhe tentativa e 29-të do të përfundojë pa epilog – veç si prolog i tjetrës.”Në deklaratën e tij publike, lideri i LDK-së bëri një apel të drejtpërdrejtë ndaj liderëve të Vetëvendosjes, PDK-së, AAK-së dhe Nismës që t’i rikthehen seriozisht propozimit për krijimin e një qeverie gjithëpërfshirëse.
“Vazhdoj ta përsëris thirrjen time drejt liderëve… që t’i kthehen propozimit tim për një Qeveri të Unitetit. Ta vlerësojnë me kujdes.” Duke vënë theksin te nevoja për dialog dhe kompromis, ai shprehu bindjen se një zgjidhje e përbashkët është e mundur. “Vazhdoj të besoj se mund të ulemi, të flasim dhe të pajtohemi për një zgjidhje të përbashkët. Kjo krizë mund të na shërbejë si mundësi.”
Si hap konkret drejt këtij qëllimi, ai paralajmëroi se gjatë kësaj jave do të paraqesë një Agjendë 15 pikëshe, si një platformë bashkëpunimi për të gjitha partitë, pa përjashtim. “Pas finalizimit të konsultimeve të brendshme, do të dal me një Agjendë 15 pikëshe – një platformë konkrete bashkëpunimi për Qeverinë e Unitetit.” Në deklaratë, kryetari i LDK-së shtroi edhe një reflektim të thelluar mbi funksionimin demokratik të vendit. Ai nënvizoi se përpara çdo balancimi opozitar, vendit i duhet një pozitë e konsoliduar dhe institucione që funksionojnë.
“Po, Kosovës i duhet një opozitë. Po, Kosovës i duhet një balanc demokratik. Por para dyjave, Kosovës i duhet një pozitë – një qeveri legjitime, një Kuvend funksional, një shtet që punon.” Duke e përmbyllur me një ton realist, por shpresëdhënës, ai theksoi nevojën për të thyer ciklin e bllokimit politik.“Le të provojmë unitetin. Mund edhe mos të jetë aq keq.”

Kanë kaluar më shumë se tre muaj nga zgjedhjet parlamentare të mbajtura më 9 shkurt 2025, por Kuvendi i Kosovës vazhdon të mbetet i pakonstituar. Edhe vazhdimi i 24-të me radhë, i mbajtur sot më 31 maj, ka dështuar të prodhojë ndonjë përparim në zgjedhjen e kryetarit të Kuvendit.
Kryesuesi i seancës, Avni Dehari, edhe këtë herë ka tentuar formimin e komisionit zgjedhor që do të mundësonte votimin të fshehtë për kryetarin e kuvendit. Mirëpo, përpjekja nuk kaloi pasi vetëm 53 deputetë votuan në favor, numër i pamjaftueshëm për të kaluar në fazën tjetër të procedurës.
Pas këtij dështimi, Dehari bëri të ditur se përpjekja e radhës për konstituimin e Kuvendit do të rinisë më 2 qershor. Ngërçi politik tashmë ka hyrë në muajin e katërt, duke thelluar krizën institucionale në vend.